2016年4月30日 星期六

ASANA一秒神水首日試用

其實我一向都用住SKII 神仙水,亦係Fans,用咗好耐好耐都覺得好用所以Keep住用嗰隻~
今次呢個ASANA一秒神水係韓國出品,亦都係打正旗號vs SKII 神仙水!
咁啱神仙水存貨用晒就嚟試下佢可唔可以令我呢個fans變心

第一晚試用先用toner抹走老化角質,再用化妝棉將呢一秒神水拍上面,係有滋潤度,成分鐘塊面都覺得笠笠地,但係肉眼唔再見到面上有濕喇,但手摸都係笠笠地,可能就係佢個59秒濕潤嘅效果嚟!

試佢一星期再同大家報告報告!
PS 如果怕笠或偏油性膚質就自己考慮下先試喇!

2016年4月28日 星期四

今期愛上嘅氣墊粉底~植村秀

相信Cushion 底妝,如粉底、CC Cream、BB Cream等都已經出到街知巷聞,各大品牌都相繼有氣墊產品連胭脂都有出氣墊系列,而且唔再係韓國品牌嘅專利喇!


但係以往買嘅Cushion 底妝品都有相同嘅缺點尤其韓國品牌出品,就係色系好白、好粉色,以我本身都白淨嘅有時都會嫌太白,雖然色系啱但係太白有時影相好爆光~所以我一直都想搵到有偏向有膚色嘅Cushion 底妝品!

可能你會話咁咪用返傳統粉底咪得囉,但係我又想講其實我貪靚嘅同時都貪快嘅!Cushion 底妝品貼面,Coverage 好又易Handle,三兩下手勢就會化到個貼面水嫩嘅底妝,針無兩頭利!同時通常Cushion 底妝品都要預持久度唔長,所以有時我返工一日個樣會慢慢變~攰!因為我唔Like補妝~太懶( ̄▽ ̄)

之前都有用開一啲品牌嘅Cushion 底妝Laneige、雪花秀、Lancôme 等等~
laneige就唔知係咪佢防水功效太強勁,我就用咗面上會不斷出暗粒,可能太焗身我嘅皮膚頂唔順;(即刻送咗比朋友,佢用又Ok喎!)
雪花秀原本係比較潤,所以我係秋冬時候用覺得非常Perfect,而且佢有5個色號比較好選擇唔使爆光;
Lancôme 滋潤度一般般所以比較係冬天尾到春天時候用都OK,而且佢有抗污染同抗炎成份,所以春夏用都唔擔心易出粒粒,膚色都有4個色號揀,但係我就絕對唔Like佢個粉卜喇!好Hea嘅一個粉卜所以換咗用雪花秀跟果個嚟上妝就好好多喇!

今次要介紹嘅Shu uemura就係我呢期至愛~
第一樣令我愛上就係佢好多色號揀,而且啲色號係偏向貼膚色,絕對唔會令面色變反白Or慘白,無論係白淨同健康膚色都應該搵到你杯茶

可以睇睇官網介紹


另外就係佢嘅貼面度好好同持久度相當好,返工或出街一日都唔見到要補妝,一日由朝到晚仍然Keep得好好,其實我好懶,極度少會係街補妝,通常化咗個妝出街就係咁咖喇!無咩特別出咗事都好少拎個化妝袋出嚟用!
另外佢個粉卜我係超級激讚,係有啲絨毛質地,係面珠或要Coverage 高嘅位就用印嘅方式,另外額頭、鼻同埋腮下位置用輕推就可以推薄,咁就可以令到成個底妝有厚薄之分,呢樣真系加分再加分(^o^)
Coverage 相當唔錯,可以唔使On top上遮瑕產品,除非黑眼圈好勁另計(黑眼圈要調色呀!)
另外佢上面效果水嫩得嚟唔會令你爆光到好似打咗水光針咁,其實水嫩呢家嘢點到即止夠就得咖喇!Shu 拿捏到喎~其實太「令」我真係唔太Like,可能本身膚色較白底再「令」埋就攪到塊面包上加包~本身我都好麵包超人咖喇=_=

呢期亦見到有唔少網絡上介紹韓國品牌百幾蚊有交易嘅高Coverage Cushion 底妝,但係睇過色號真係太少了得兩號仲要兩號都係偏白,唔係我杯茶,同埋呢個植村秀我真係未捨得唔用住呀!